19.12.2013
Денес, Европската вселенска агенција (ЕСА) го лансира најмоќниот вселенски телескоп „Гаја“ со ултраосетлива камера чија резолуција изнесува еден гигапиксел (милијарда пиксели). Проектот чини околу 740 милиони евра и е еден од најамбициозните досега изведени од ЕСА. Целта е камерата и инструментите на телескопот да ги забележат положбите, оддалеченостите и некои други карактеристики на над милијарда ѕвезди од нашата Галактика, а притоа ќе го мерат движењето на околу 150 милиони ѕвезди. Со тоа ќе се добие подобар увид во развојот на галактиката и нејзиниот еволуциски стадиум. Исто така, прецизните инструменти на телескопот ќе откриваат нови ѕвезди, планети и астероиди, кои не можеа да се видат со досегашните телескопи. Всушност станува збор за 2 телескопи поставени на иста платформа и 3 извонредно прецизни инструменти. Целиот проект е разработуван речиси 20 години од повеќе држави во Европа и се очекува да биде еден од најуспешните проекти од ваков тип.
Инаку, „Гаја“ е лансирана со помош на руската ракета „Сојуз“ од Француска Гвајана, а орбитата ќе биде на оддалеченост од 1,5 милиони км, на темната страна на Земјата (заради избегнување на пречките од Сонцето).
Автор: д-р Ивица Милевски
Оваа статија е прочитана 4066 пати!
