15.11.2016
Како што информираа речиси сите медиуми (вклучително и ИГЕО-порталот), вчера бевме сведоци на т.н. Супермесечина, односно полна Месечина на најблиското растојание (перигеум) до Земјата во последните 68 години. Заради ваквата положба, Месечината изгледаше за околу 15% поголема и околу 30% посјајна од просечната полна Месечина, а за околу 1-3% поголема и посјајна од супермесечините во последните години. Реално, тие неколку проценти големина или сјајност во однос на претходните слични појави се едвај забележливи (поточно најчесто незабележливи) за човекот. Сепак, по медиумите можат да се видат фотографии на огромна Месечина, неспоредливо поголема од нормалната појава и од објектите во околината. Најчесто станува збор за обична фотомонтажа, односно комбинација на 2 фотографии: една обична од даден простор-пејсаж и една фотографија на која Месечината е снимена со зголемување (зум) од 10, 20, 30 или повеќе пати. Едноставно, фотографијата на Месечината се нанесува на нормалната пејсажна фотографија и се добива ефект на огромна појава.
Според големината на Месечината на вакви фотографии, би произлегло дека таа е на само 100 000-150 000 km од Земјата, наспроти реалните 356 508 km, на кое растојание беше вчера. Кога би била навистина толку блиску, Земјата би трпела страшни последици: огромни плимски бранови, зачестени земјотреси и вулкански ерупции со катастрофален карактер, огромни цунами бранови, а денот и ноќта би траеле по само околу 5-6 часа. Во такви услови, тешко дека би постоел животот онаков како што го знаеме, а за човекот воопшто да не зборуваме. Всушност, во геолошката историја, Месечината навистина била толку блиску и толку голема (кога би се гледала од Земјата), но пред повеќе од 2 милијарди години! Тоа значи дека од создавањето, патеката (положбата) на Месечината е се подалеку од Земјата, а таа и денес се оддалечува по околу 3,8 cm годишно или околу 4 метри за еден век.
Како и да е, вчерашната Супермесечина беше интересна и возбудлива појава, но далеку од спектакуларноста прикажана на најголем дел од монтираните фотографии.
Автор: д-р Ивица Милевски
Оваа статија е прочитана 4911 пати!
