На 5 септември 2024 година, беше успешно лансиран Sentinel-2C, трет сателит од мисијата Sentinel-2, која е дел од европската Коперникус програма за набљудување на Земјата. Овој сателит овозможува висока прецизност и подобрена резолуција на снимките, што го прави клучен за следење на глобалните промени на земјината површина.
Иако Sentinel-2A и Sentinel-2B и понатаму функционираат, Sentinel-2C е дизајниран да го замени Sentinel-2A. Ако сите три сателити се одржат во орбитата, тоа би резултирало со подобрена можност за снимање без облаци, што е посебно важно за облачни региони.
Времетраење на снимање и резолуција
Sentinel-2C ќе обезбедува нови снимки на секои 5 дена, а со сите три сателити, ова време би можело да се намали на 3 дена. Сателитот има резолуции од 10 m, 20 m, и 60 m за различни спектрални канали. Една снимка опфаќа површина од 290 km, што овозможува детален мониторинг на големи подрачја.
Примена на Sentinel-2C податоците
Податоците од Sentinel-2C наоѓаат примена во различни научни и практични области и тоа:
- Следење на земјоделски површини: Овозможува детална анализа на здравјето на растенијата и следење на состојбата на земјоделските култури, со можност за рано откривање на суши или болести.
- Мониторинг на природни катастрофи: Sentinel-2C може да ги мапира подрачјата погодени од поплави, пожари, свлечишта и одрони е, што е клучно за брза реакција и заштита.
- Мониторинг на климатски промени: Сателитот обезбедува податоци за долгогодишно следење на промени во глечерите, деградација на шумите, крајбрежна ерозија и сл., што е важно за справување со последиците од климатските промени.
Спектрални канали (бендови)
Sentinel-2C користи 13 различни спектрални канали кои покриваат широк опсег на бранови должини, од видлива светлина до краткобранова инфрацрвена (SWIR). Некои од главните канали вклучуваат:
- B2 (Сина): Користи за мапирање на водни тела и анализирање на океанските екосистеми.
- B4 (Црвена): Идеален за класификација на земјиште и вегетација.
- B8 (Блиско инфрацрвено): Овозможува следење на состојбата на вегетацијата.
- B11 и B12 (SWIR): Користат за мониторинг на содржината на влага во почвата и за детекција на пожари.
Овој нов сателит го зголемува капацитетот за набљудување на Земјата и е важен инструмент за научно-апликативни истражувања и управување со природните ресурси, особено за оние кои се занимаваат со далечинска детекција.
Референца: www.esa.int
Изработила: м-р Бојана Алексова
